രക്ഷാധികാരിയായി അമ്പതാണ്ടുകള്‍; അഴീക്കോടിന്റെ സ്മരണയില്‍ സി.ജെ.സ്മാരകസമിതി

വിജയകുമാര്‍ കൂത്താട്ടുകുളം

സി.ജെ.സ്മാരക പ്രസംഗ സമിതി യോഗത്തില്‍ പങ്കെടുക്കുന്ന സുകുമാര്‍
അഴീക്കോട്. കാവാലം നാരായണപണിക്കര്‍, അയ്യപ്പപ്പണിക്കര്‍ റോസി
തോമസ്‌ എന്നിവര്‍ സമീപം- 1998

''നമ്മുടെ എഴുത്തിന്റെ ഉയരങ്ങളില്‍ വന്ന് തിളങ്ങി മറഞ്ഞുപോയ ഒരു ചലല്‍പ്രഭയായിരുന്നു. ആരോടും ചോദിക്കാതെ കടന്നുകയറി ഇരിക്കുകയും ആരോടും മിണ്ടാതെ ഇറങ്ങിപ്പോവുകയും ചെയ്ത ആള്‍. ആ അതിഥിയെ- ശരിയായ അര്‍ത്ഥത്തില്‍ അതിഥി തന്നെ!- കാത്ത് ഏതേ ഒരുസ്ഥാനം മലയാളത്തില്‍ എവിടെയോ ഒഴിഞ്ഞുകിടപ്പുണ്ട്. അത് ഉണ്ടാക്കിയെടുത്ത അദ്ദേഹം പോകുമ്പോള്‍ അങ്ങോട്ട് തിരിഞ്ഞുനോക്കിയില്ല''- കൂത്താട്ടുകുളം സി.ജെ. സ്മാരക സമിതിയുടെ രക്ഷാധികാരിയായ ഡോ. സുകുമാര്‍ അഴീക്കോട് സി.ജെ.തോമസിനെക്കുറിച്ച് എഴുതിയ ഏറ്റവും ഒടുവിലത്തെ വരികള്‍.

അഴീക്കോടിന്റെ സാന്നിധ്യമില്ലാത്ത സി.ജെ.സ്മാരക സമിതിയുടെ വിശേഷാല്‍ പരിപടികള്‍ വിരളമായിരുന്നു. 1961ല്‍ സി.ജെ.തോമസിന്റെ സ്മരണ നിലനിര്‍ത്താനായി സ്മാരക സമിതിക്ക് രൂപം കൊടുക്കുമ്പോള്‍ രക്ഷാധികാരികളായി അഴീക്കോടിന് പുറമേ പ്രൊഫ. എം.കെ.സാനു, ചെമ്മനം ചാക്കോ, അയ്യപ്പപ്പണിക്കര്‍, ആര്‍.എസ്. പൊതുവാള്‍, സി.എന്‍.കുട്ടപ്പന്‍ എന്നിവരും ഉണ്ടായിരുന്നു.

1998-ല്‍ സി.ജെ.സ്മാരക പ്രസംഗ സമിതിയുടെ അബ്രാഹം വടക്കേല്‍
പുരസ്കാരം കാവാലം നാരായണപണിക്കര്‍‍ക്കു് സുകുമാര്‍ അഴീക്കോട് നല്കുന്നു

കൂത്താട്ടുകുളത്ത്  പതിവായി സംഘടിപ്പിക്കുന്ന സി.ജെ. സ്മാരക പ്രസംഗങ്ങളിലും റവ. എബ്രഹാം വടക്കേല്‍ അവാര്‍ഡുദാന ചടങ്ങിലും അഴീക്കോട് പങ്കെടുത്തിരുന്നു. 1998 മെയ് 30ന് കൂത്താട്ടുകുളം ടൗണ്‍ഹാളില്‍ സി.ജെ.സ്മാരക സമിതി സംഘടിപ്പിച്ച സ്വാതന്ത്ര്യത്തിന്റെ അന്‍പതുവര്‍ഷങ്ങള്‍ എന്ന വിഷയത്തെ ആസ്​പദമാക്കിയുള്ള സെമിനാര്‍ ഉദ്ഘാടനം ചെയ്തത് അഴീക്കോടായിരുന്നു. സി.ജെയുടെ ഭാര്യ റോസി തോമസ്, അയ്യപ്പപ്പണിക്കര്‍ എന്നിവര്‍ ചടങ്ങിലുണ്ടായിരുന്നു. കൂത്താട്ടുകുളവുമായി ഏറെ ബന്ധമുള്ള അഴീക്കോട് ഏറ്റവും ഒടുവില്‍ എത്തിയത് 2006 ഡിസംബര്‍ 30ന് ആയിരുന്നു.

കൂത്താട്ടുകുളത്ത് സി.ജെ.സ്മാരക മന്ദിരത്തിന്റെ ഉദ്ഘാടനത്തോടനുബന്ധിച്ച് നടന്ന 'മലയാള സാഹിത്യം കേരളപ്പിറവിക്കുശേഷം' എന്ന വിഷയത്തെ ആസ്​പദമാക്കി നടന്ന സെമിനാറില്‍ മുഖ്യപ്രഭാഷണം നടത്തിയതും അഴീക്കോടുതന്നെയായിരുന്നു.

ഫോട്ടോകള്‍ വിജയകുമാര്‍ കൂത്താട്ടുകുളത്തിന്റെ ശേഖരത്തില്‍ നിന്നു്