എഴുത്ത് ജനാധിപത്യത്തിന്റെ ഒരു രൂപം : എസ് ഹരീഷ്

സുന്ദര രാമസ്വാമി 1981 ൽ രചിച്ച ജേ.ജേ.: ചില കുറിപ്പുകൾ എന്ന തമിഴ്‌ നോവലിനെ അധികരിച്ച് കൂത്താട്ടുകുളം കേന്ദ്രമായ സി.ജെ സ്മാരക പ്രസംഗ സമിതിയുടെ ആഭിമുഖ്യത്തിൽ നടന്ന ചർച്ചാ പരിപാടിയിൽ പ്രമുഖ മലയാള നോവലിസ്റ്റ് എസ് ഹരീഷ് സംസാരിയ്ക്കുന്നു. സി.ജെ. സ്മാരക പ്രസംഗ സമിതിപ്രസിഡന്റ് ഡോ. എൻ. അജയകുമാർ യുവ കഥാകൃത്ത് റോസ് മെറിൻ ജോജോ എന്നിവർ സമീപം.

 കൂത്താട്ടുകുളം: എഴുത്ത് ജനാധിപത്യ പ്രവർത്തനത്തിന്റെ ഒരു രൂപമാണെന്നാണ് താൻ കരുതുന്നതെന്ന് നോവലിസ്റ്റ് എസ്. ഹരീഷ് അഭിപ്രായപ്പെട്ടു

മലയാള സാഹിത്യകാരൻ സി. ജെ തോമസിനെ കേന്ദ്ര കഥാപാത്രമാക്കി പ്രമുഖ തമിഴ് നോവലിസ്റ്റും കവിയുമായിരുന്ന സുന്ദര രാമസ്വാമി 1981 ൽ എഴുതിയ ജേ.ജേ. ചില കുറിപ്പുകൾ എന്ന നോവലിനെ അധികരിച്ച് സി.ജെ. സ്‌മാരക പ്രസംഗ സമിതിയുടെ ആഭിമുഖ്യത്തിൽ 2026 നവംബർ 14 നു രാവിലെ കൂത്താട്ടുകുളം പെൻഷൻ ഭവനിൽ സംഘടപ്പിച്ച ചർച്ചാ പരിപാടിയിൽ സംസാരിക്കുകയായിരുന്നു അദ്ദേഹം. സാംസ്കാരിക നായകരെന്നു ഭാവിയ്ക്കുന്ന പലരും സ്വന്തം പ്രതിഛായയ്ക്കു കോട്ടം വരാത്ത വിധത്തിൽ മാത്രം സംസാരിക്കുമ്പോൾ സി ജെയെപ്പോലുള്ള സ്വതന്ത്ര ചിന്തകൾ പ്രതിഛായയ്ക്കും നിലനില്പിനും വേണ്ടി വഴങ്ങുവാൻ തയ്യാറായില്ല. അതുകൊണ്ട് സിജെ ആഘോഷിക്കപ്പെട്ടില്ല. വിഗ്രഹമായി മാറിയുമില്ല. എന്നാൽ അദ്ദേഹം എക്കാലത്തും ആദരിക്കപ്പെട്ടു. വിമർശിക്കപ്പെടുകയും ചെയ്തു.

എഴുത്ത് ജനാധിപത്യ പ്രവർത്തനത്തിന്റെ
ഒരു രൂപം ചിത്രം CC BY-SA 4.0

തമിഴ് നോവലിസ്റ്റും കവിയുമായിരുന്ന സുന്ദര രാമസ്വാമി  എഴുതിയ ജേ.ജേ. ചില കുറിപ്പുകൾ എന്ന നോവലിന്റെ എഴുത്തു രീതി  നോവലുകളുടെ പരമ്പരാഗത ഘടനയെ മാറ്റിക്കൊണ്ടുള്ള ചുവടുവയ്പായിരുന്നുവെന്ന്  അദ്ദേഹം പറഞ്ഞു. കഥപറച്ചിൽ രീതി വളരെ പ്രധാനമാണ് - അദ്ദേഹം  ചൂണ്ടിക്കാട്ടി.

 യുവ കഥാകാരി റോസ് മെറിൻ ജോജോ തന്റെ ഉത്തരോത്തരം എന്ന കഥ വായിച്ചു. 

സി ജെ സ്മ‌ാരക പ്രസംഗ സമിതി പ്രസിഡന്റ് ഡോ. എൻ . അജയകുമാർ അദ്ധ്യക്ഷനായിരുന്നു.  സെക്രട്ടറി ഡി പ്രേംനാഥ് സ്വാഗതവും ഖജാൻജി എ. കെ. വിജയകുമാർ നന്ദിയും പറഞ്ഞു.

മലയാളത്തിലെ സി .ജെ തോമസിനെ കേന്ദ്ര കഥാപാത്രമാക്കി തമിഴിൽ എഴുതിയ ജേ.ജേ. ചില കുറിപ്പുകൾ എന്ന നോവലിനെ അധികരിച്ച് ചർച്ച

സുന്ദര രാമസ്വാമി
-ചിത്രം വിക്കിമീഡിയ
കോമൺസിൽ നിന്ന്

കൂത്താട്ടുകുളം: മലയാള സാഹിത്യകാരനായ സി .ജെ തോമസിനെ കേന്ദ്ര കഥാപാത്രമാക്കി തമിഴ് നോവലിസ്റ്റും കവിയുമായിരുന്ന സുന്ദര രാമസ്വാമി  എഴുതിയ ജേ.ജേ. ചില കുറിപ്പുകൾ എന്ന നോവലിനെ അധികരിച്ചു് സി. ജെ. സ്‌മാരക പ്രസംഗ സമിതിയുടെ ആഭിമുഖ്യത്തിൽ 2026 നവംബർ 14 നു രാവിലെ 10 മണിക്ക് കൂത്താട്ടുകുളം പെൻഷൻ ഭവനിൽ വച്ച് ഒരു ചർച്ചാ വേദി  സംഘടിപ്പിയ്ക്കുന്നു. സി ജെ സ്മ‌ാരക പ്രസംഗ സമിതി പ്രസിഡന്റ് ഡോ. എൻ. അജയകുമാർ സെക്രട്ടറി ഡി. പ്രേംനാഥ് എന്നിവർ അറിയിച്ചതാണിക്കാര്യം. കേരള സാഹിത്യ അക്കാദമി അവാർഡും വയലാർ അവാർഡും ഉൾപ്പെടെ നിരവധി പുരസ്ക്‌കാരങ്ങൾ ലഭിച്ച മലയാള സാഹിത്യ വേദിയിലെ ശ്രദ്ധേയനായ നോവലിസ്റ്റും, ചെറുകഥാകൃത്തും, തിരക്കഥാകൃത്തുമായ എസ്. ഹരീഷാണ് പരിപാടിയ്ക്ക് നേതൃത്വം നൽകുന്നത്.

തുടർന്ന് മാതൃഭൂമി വാരിക നടത്തിയ വിഷു സാഹിത്യ കഥാമത്സരത്തിൽ സംസ്ഥാന തലത്തിൽ ചുരുക്കപ്പട്ടികയിൽ ഇടം നേടിയ 25 കഥകളിൽ ഒന്നായ ' ഉത്തരോത്തരം'  എന്ന കഥയുടെ രചയിതാവ് കുമാരി റോസ് മെറിൻ ജോജോ തന്റെ കഥ വായിക്കും . കഥാകാരി മഹാത്മാഗാന്ധി സർവ്വകലാശാലയിൽ നിന്ന് 2024-ൽ മലയാള സാഹിത്യത്തിൽ ബിരുദത്തിനു ഒന്നാം റാങ്കിനും, 2026 ൽ ബിരുദാനന്തര ബിരുദത്തിനു അതേ സർവ്വകലാശാലയിൽ നിന്ന് രണ്ടാം റാങ്കിനും അർഹയായിട്ടുണ്ട് .കുറവിലങ്ങാട്  ദേവമാതാ കോളേജിൽ ആയിരുന്നു പഠനം, കൂത്താട്ടുകുളത്തെ തിരുമാറാടി സ്വദേശിയാണ് റോസ് മെറിൻ ജോജോ. 

ജേ.ജേ. ചില കുറിപ്പുകൾ

ജെജെ സില കുറിപ്പുകൾ (ஜே.ஜே:சில குறிப்புகள் ) അഥവാ ജേ.ജേ. ചില കുറിപ്പുകൾ (J.J.: Some Jottings) പ്രശസ്ത തമിഴ് എഴുത്തുകാരൻ സുന്ദര രാമസ്വാമി 1981-ൽ രചിച്ച വിഖ്യാതമായ ആധുനിക തമിഴ് നോവലാണ്. മലയാള സാഹിത്യലോകവുമായി അടുത്ത ബന്ധമുള്ള ഈ കൃതി ആഖ്യാനശൈലി കൊണ്ടും പ്രമേയം കൊണ്ടും ഇന്ത്യൻ സാഹിത്യത്തിൽ വലിയ ചർച്ചകൾക്ക് വഴിവെച്ചിട്ടുണ്ട്.

•  അന്തരിച്ച പ്രശസ്ത മലയാള എഴുത്തുകാരനായ ജോസഫ് ജെയിംസിന്റെ (ജേ.ജേ.) ജീവചരിത്രം എഴുതാൻ തമിഴ് എഴുത്തുകാരനായ ബാലു നടത്തുന്ന ശ്രമങ്ങളാണ് നോവലിന്റെ ആദ്യഭാഗം. രണ്ടാം ഭാഗത്തിൽ ജേ.ജേ.യുടെ ഡയറിക്കുറിപ്പുകളുടെ വിവർത്തനമാണ് ഉൾപ്പെടുത്തിയിരിക്കുന്നത്.

• നോവലിലെ കേന്ദ്രകഥാപാത്രമായ ജേ.ജേ., പ്രശസ്ത മലയാള നാടകകൃത്തും നിരൂപകനുമായിരുന്ന സി.ജെ. തോമസിനെ (C.J. Thomas) ആസ്പദമാക്കി സൃഷ്ടിച്ചതാണെന്ന് നിരൂപകർ വിലയിരുത്തുന്നു. ആഖ്യാതാവായ ബാലു എന്ന കഥാപാത്രം സുന്ദര രാമസ്വാമി തന്നെയാണെന്നും കരുതപ്പെടുന്നു.

• സാഹിത്യലോകത്തെ രാഷ്ട്രീയവും, കലാകാരന്റെ ആത്മാർത്ഥതയും, വ്യക്തിപരമായ അജണ്ടകളും നോവലിൽ ആക്ഷേപഹാസ്യത്തോടെ വിമർശി
ക്കപ്പെടുന്നു. സാധാരണ നോവലുകളുടെ ഘടനയെ പൊളിച്ചെഴുതുന്ന ഒരു പരീക്ഷണാത്മക കൃതിയാണിത്.

• വിവർത്തനങ്ങൾ: എ.ആർ. വെങ്കിടാചലപതി ഇംഗ്ലീഷിലേക്ക് വിവർത്തനം ചെയ്ത ഈ കൃതി 'JJ: Some Jottings' എന്ന പേരിൽ പ്രസിദ്ധീകരിച്ചിട്ടുണ്ട്. മലയാളത്തിൽ 'ജേ.ജേ. ചില കുറിപ്പുകൾ' എന്ന പേരിൽ ഡി.സി. ബുക്സ് ഇത് പ്രസിദ്ധീകരിച്ചിട്ടുണ്ട്.

* സുന്ദര രാമസ്വാമിയെപ്പറ്റി കൂടുതൽ അറിയാൻ തമിഴ് വിക്കിപ്പീഡിയ (ഇങ്ഗ്ലീഷ്) നോക്കുക. 

* തമിഴ് വിക്കിപ്പീഡിയ യാന്ത്രീകവിവർത്തനം (മലയാളമൊഴി)

* ഇങ്ഗ്ലീഷ് വിക്കിപ്പീഡിയ 

  

സി.ജെ സ്മാരക പ്രസംഗങ്ങളും റവ.ഡോ. അബ്രാഹം വടക്കേൽ പുരസ്കാര ദാനവും ഫെബ്രുവരി 21 ശനിയാഴ്ച കൂത്താട്ടുകുളത്ത്

> സിമ്പോസിയം  "പ്രൊഫ: ജി.കുമാരപിള്ളയുടെ രചനാലോകം"

> പ്രൊഫ. ഇ. വി. രാമകൃഷ്‌ണൻ രചിച്ച കവിതയുടെ ഉപ്പ് എന്ന ഗ്രന്ഥത്തിനാണ് സാഹിത്യവിമർശനത്തിനുള്ള 2026-ലെ റവ.ഡോ. അബ്രാഹം വടക്കേൽ പുരസ്കാരം 

> സിജെ സ്മാരക പ്രസംഗ വേദിയിൽ വച്ചു പ്രഫ. എം തോമസ് മാത്യു പുരസ്കാരം ഡോ. ഈ വി രാമകൃഷ്ണന്  സമ്മാനിയ്ക്കും.

കൂത്താട്ടുകുളം : സിജെ സ്മാരക പ്രസംഗസമിതിയുടെ ആഭിമുഖ്യത്തിലുള്ള സി.ജെ സ്മാരക പ്രസംഗങ്ങളും സി.ജെ.സ്മാരക പ്രസംഗസമിതി 1980 മുതൽ കൊടുത്തുവരുന്ന റവ.ഡോ. അബ്രാഹം വടക്കേൽ പുരസ്കാര ദാനവും 2026 ഫെബ്രുവരി 21 ശനിയാഴ്ച ഉച്ചകഴിഞ്ഞ് കൂത്താട്ടുകുളം കെ.റ്റി ജേക്കബ് മെമ്മോറിയൽ ടൗൺഹാളിൽ വച്ച് നടക്കും. ഉച്ചകഴിഞ്ഞ് 2 മണിയ്ക്ക്  തുടങ്ങുന്ന "പ്രൊഫ: ജി.കുമാരപിള്ളയുടെ രചനാലോകം" എന്ന സിമ്പോസിയത്തിനുശേഷം വൈകുന്നേരം 6മണിയ്ക്കു നടക്കുന്ന പൊതു സമ്മേളനത്തിൽ പ്രൊഫ. ഇ. വി. രാമകൃഷ്‌ണൻ രചിച്ച കവിതയുടെ ഉപ്പ് എന്ന ഗ്രന്ഥത്തിന്, സാഹിത്യവിമർശനത്തിനുള്ള 2025-ലെ റവ.ഡോ. അബ്രാഹം വടക്കേൽ പുരസ്കാരം പ്രഫ. എം തോമസ് മാത്യു സമ്മാനിക്കും.

ഉച്ചകഴിഞ്ഞ് 2 മണിയ്ക്ക്  സിമ്പോസിയം ആരംഭിയ്ക്കും. "പ്രൊഫ: ജി.കുമാരപിള്ളയുടെ രചനാലോകം" എന്നതാണ്  സിമ്പോസിയത്തിന്റെ വിഷയം. 'ഭാഷയുടെ മൃത്യുഞ്ജയം മനുഷ്യന്റെയും - ജി. കുമാരപിള്ളയുടെ കവിതകൾ മുൻ നിർത്തി ഒരന്വേഷണം' എന്ന പ്രബന്ധം പ്രൊഫ.എം. തോമസ് മാത്യുവും 'കുമാരപിള്ളക്കവിതയുടെ സാമൂഹികസന്ദർഭങ്ങൾ 'എന്ന പ്രബന്ധം പ്രൊഫ. ഇ.വി. രാമകൃഷ്‌ണനും 'ഭാവഗീതത്തിലെ നവ സർഗം' എന്ന പ്രബന്ധം  ശ്രീ.കെ.വി. സജയു്യും 'ജി. കുമാരപിള്ളയുടെ വിമർശനസമീപനങ്ങൾ' എന്ന പ്രബന്ധം ഡോ.ആര്യ കെ.യും അവതരിപ്പിക്കും. ഡോ. എൻ. അജയകുമാർ മോഡറേറ്റു ചെയ്യും. എബി ജോൺ വൻനിലം കൃതജ്ഞതയർപ്പിക്കും. 

സിമ്പോസിയത്തിനുശേഷം വൈകുന്നേരം 6മണിയ്ക്കു നടക്കുന്ന പൊതു സമ്മേളനത്തിൽ സി.ജെ. സ്‌മാരക പ്രസംഗ സമിതി പ്രസിഡന്റ്റ് ഡോ. എൻ. അജയകുമാർ അധ്യക്ഷനായിരിയ്ക്കും. വൈസ്  പ്രസിഡന്റ് ജോസ് കരിമ്പന സ്വാഗതം ആശംസിയ്ക്കും. 

തുടർന്ന് പ്രൊഫ. എം. തോമസ് മാത്യു 10,000 രൂപയും പ്രശസ്തിപത്രവും ശില്പ‌വും അടങ്ങുന്ന റവ.ഡോ. അബ്രാഹം വടക്കേൽ പുരസ്കാരം കവിതയുടെ ഉപ്പ് എന്ന ഗ്രന്ഥത്തിന്റെ രചയിതാവായ പ്രൊഫ. ഇ.വി. രാമകൃഷ്‌ണനു നല്കും.

കഥാകൃത്ത് ബിജു സി. പി. കവിതയുടെ ഉപ്പ് എന്ന ഗ്രന്ഥത്തെ  പരിചയപ്പെടുത്തും. സി.ജെ. സ്‌മാരക പ്രസംഗ സമിതി ട്രഷറർ എ.കെ. വിജയകുമാർ പ്രശംസാ പത്രം വായിയ്ക്കും. 

 തുടർന്നു കൂത്താട്ടുകുളം നഗര സഭാദ്ധ്യക്ഷൻ റെജി ജോണും കൗൺസിലർ സണ്ണി കുര്യാക്കോസും ആശംസകളർപ്പിയ്ക്കും. പ്രൊഫ. ഇ.വി. രാമകൃഷ്‌ണന്റെ മറുപടി പ്രസംഗം നടത്തും. സി.ജെ. സ്‌മാരക പ്രസംഗ സമിതി സെക്രട്ടറി പ്രേംനാഥ്. ഡി. നന്ദി പറയും. 

സന്ധ്യയ്ക്ക് ഏഴരമണിയ്ക്ക് പ്രൊഫ. ജി. കുമാരപിള്ള ഗാന രചനയും ജി. അരവിന്ദൻ സംവിധാനവും നിർവഹിച്ച ഉത്തരായനം എന്ന സിനിമയുടെ പ്രദർശനവുമുണ്ടായിരിയ്ക്കും.

കഥയുടെ കഥയെപ്പറ്റി കഥാ കൃത്ത് പി. എഫ്. മാത്യൂസുമായി സംസാരിക്കാം

കൂത്താട്ടുകുളം --  സി ജെ സ്മാരക പ്രസംഗ സമിതിയുടെ ആഭിമുഖ്യത്തിൽ 2023 ജൂലൈ  28  വെള്ളിയാഴ്ച  ഉച്ചകഴിഞ്ഞു 3  മണിക്ക്  കൂത്താട്ടുകുളം  സി ജെ സ്മാരക മന്ദിരത്തിലെ  സി ജെ സ്മാരക ഗ്രന്ഥശാലാ  ഹാളിൽ "കഥാ കൃത്ത് പി എഫ്  മാത്യൂസുമായി സംസാരിക്കാം"  എന്ന സംവാദ പരിപാടി നടക്കും.

 കഥാസാഹിത്യത്തിനുള്ള  2022  ലെ  കേരള സാഹിത്യ അക്കാദമി  പുരസ്‌കാരം നേടിയ കഥാ കൃത്തും തിരക്കഥാ കൃത്തുമായ പി എഫ്  മാത്യൂസ് "കഥയുടെ കഥ" എന്ന വിഷയത്തിൽ പ്രഭാഷണം നടത്തും. സി ജെ സ്മാരക പ്രസംഗ സമിതിയുടെ പ്രസിഡന്റ്  ഡോ . എൻ  അജയകുമാർ അദ്ധ്യക്ഷനായിരിയ്ക്കും.

മലയാളത്തിലെ കഥാകരൻമാരിൽ ശ്രദ്ധേയനായ പി എഫ്  മാത്യൂസിന്റെ പ്രധാന കൃതികൾ കടലിന്റെ മണം, ചില പ്രാചീന വികാരങ്ങൾ,  അടിയാളപ്രേതം , ഇരുട്ടിൽ ഒരു പുണ്യാളൻ ,27 ഡൌൺ ,ചാവുനിലം, മുഴക്കം എന്നിവയാണ്. കുട്ടി സ്രാങ്ക്,  തന്ത്രം , പുത്രൻ ,ആന്റി ക്രൈസ്റ്റ് , ഈ .മാ .യു . അതിരൻ എന്നീ സിനിമകൾക്കു തിരക്കഥ രചിച്ചു. ദൂരദർശന്റെ  ശരറാന്തൽ എന്ന ടെലി സീരീസിന്  സ്ക്രീൻ പ്ലൈ  രചിച്ചതിനു  1991 ലെ സ്റ്റേറ്റ് ടെലിവിഷൻ അവാർഡും മിഖായെലിന്റെ  സന്തതികൾ  എന്ന ടെലി സീരിയലിനു  1993 ലെ  സ്റ്റേറ്റ്  ടെലിവിഷൻ അവാർഡും ലഭിച്ചിട്ടുണ്ട്. കുട്ടി തിരക്കഥ രചനയിൽ  2010 ലെ  നാഷണൽ  ഫിലിം അവാർഡും  ലഭിച്ചു . മുഴക്കം എന്ന കൃതിയുടെ പേരിലാണു കഥാസാഹിത്യത്തിനുള്ള  2022  ലെ  കേരള സാഹിത്യ അക്കാദമി  പുരസ്‌കാരം അദ്ദേഹത്തിനു ലഭിച്ചത്. 

സി ജെ സ്മാരക പ്രസംഗ സമിതി സെക്രട്ടറി ഡി പ്രേംനാഥ് ആണു ഇക്കാര്യം അറിയിച്ചത്.

സി.ജെ. സ്മാരക പ്രസംഗസമിതി ഏർപ്പെടുത്തിയിട്ടുള്ള റവ. ഡോ. ഏബ്രഹാം വടക്കേൽ പുരസ്കാരം ഡോ.എം.വി.നാരായണന്റെ ഓർമയുടെ ഉത്ഭവം എന്ന കൃതിയ്ക്ക്

ഡോ.എം.വി.നാരായണൻ

കൂത്താട്ടുകുളം: സി.ജെ. സ്മാരക പ്രസംഗസമിതിയുടെ 2002-ലെ സാഹിത്യവിമർശനത്തിനുള്ള  റവ.ഡോ.ഏബ്രഹാം വടക്കേൽ പുരസ്കാരം അവതരണ പഠനം, രംഗകല, സംസ്കാര പഠനം, സിദ്ധാന്തം തുടങ്ങിയ വിഷയമേഖലകളിൽ ശ്രദ്ധാർഹമായ പഠനങ്ങൾ നടത്തിവരുന്ന പണ്ഡിതനും എഴുത്തുകാരനും ആയ പ്രൊഫ. ഡോ. എം.വി.നാരായണൻ എഴുതിയ ഓർമ്മയുടെ ഉത്ഭവം സംസ്കാര/ അവതരണ പഠനങ്ങൾ എന്ന ഗ്രന്ഥത്തിനാണ് നല്കുന്നതെന്ന് സി.ജെ. സ്മാരക പ്രസംഗസമിതി പ്രസിഡന്റ് ഡോ. എൻ. അജയകുമാർ അറിയിച്ചു. 

പ്രൊഫ. ഡോ. എം. തോമസ് മാത്യു അദ്ധ്യക്ഷനും പ്രൊഫ. ഡോ. കെ.എം. അനിൽ, പ്രൊഫ. ഡോ. എൻ. അജയകുമാർ എന്നിവർ അംഗങ്ങളുമായ സമിതിയാണ് പുരസ്കാരത്തിന് അർഹമായ പുസ്തകം തെരഞ്ഞെടുത്തത്. സൈദ്ധാന്തികമായ ഉൾബലവും  നിരീക്ഷണങ്ങളിലുള്ള സൂക്ഷ്മതയും നവീനതയും ഒത്തിണങ്ങിയ ഡോക്ടർ എം.വി. നാരായണന്റെ പഠനങ്ങൾ മലയാളത്തിലെ വിമർശന സാഹിത്യത്തെ സമകാലികമാക്കുന്നതിൽ മുഖ്യ പങ്കുവഹിച്ചിട്ടുണ്ടെന്ന് പുരസ്കാരസമിതി അഭിപ്രായപ്പെട്ടു. രംഗകലാ -അവതരണങ്ങളുടെ സാംസ്കാരിക വായനയെന്ന് വിശേഷിപ്പിക്കാവുന്ന അത്തരം പഠനങ്ങൾ ഓർമ്മയുടെ ഉത്ഭവം എന്ന ഗ്രന്ഥത്തിൻറെ മുഖ്യഭാഗമാണെന്ന് സമിതി വിലയിരുത്തി. 

പുരസ്കാരത്തിനുതെരഞ്ഞെടുത്ത കൃതികൂടാതെ ഇടം അവതരണം കാഴ്ച വഴികൾ - ദൃശ്യകലയ്ക്ക് ഒരു പുതു സമീപനം,  സ്‌പേസ്, ടൈം ആൻഡ് വേയ്‌സ് ഓഫ് സീയിംഗ്: ദി പെർഫോമൻസ് കൾച്ചർ ഓഫ് കൂടിയാട്ടം  (Space, Time and Ways of Seeing: The Performance Culture of Kutiyattam) എന്നീ കൃതികളും ദേശീയവും അന്തർദേശീയവുമായ ജേർണലുകളിലും സമാഹൃത ഗ്രന്ഥങ്ങളിലും പ്രസിദ്ധീകരിച്ച നിരവധി ലേഖനങ്ങളും അദ്ദേഹത്തിന്റേതായുണ്ട്. തൃശൂർ സെൻറ് തോമസ് കോളേജ്, കോഴിക്കോട് സർവ്വകലാശാല, ഷാർജ യൂണിവേഴ്സിറ്റി, ജപ്പാനിലെ മിയാസാക്കി ഇൻറർനാഷണൽ യൂണിവേഴ്സിറ്റി എന്നിവിടങ്ങളിൽ അധ്യാപകനും ഷിംലയിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് അഡ്വാൻസ്ഡ് സ്റ്റഡിയിൽ ഫെലോയുമായിരുന്ന പ്രൊഫസർ എം.വി. നാരായണൻ ഇപ്പോൾ കാലടി ശ്രീ ശങ്കരാചാര്യ സംസ്കൃത സർവകലാശാലയുടെ വൈസ് ചാൻസലറാണ്.

ഡിസംബർ 3-ാം തിയതി കൂത്താട്ടുകുളം ടൗൺഹാളിൽ നടക്കുന്നതായ സി.ജെ. സ്മാരക പ്രസംഗ വേദിയിൽ വച്ച് പുരസ്കാര സമിതി അദ്ധ്യക്ഷൻ പ്രൊഫ. എം. തോമസ് മാത്യു അവാർഡ് ദാനം നിർവഹിക്കും.

2022 ലെ  സി.ജെ. സ്മാരക പ്രസംഗങ്ങൾ 'സ്വാതന്ത്ര്യത്തിന്റെ എഴുപത്തഞ്ചാണ്ടുകൾ' എന്ന വിഷയത്തിൽ മുഴുദിന സിമ്പോസിയമായി രാവിലെ ഒമ്പതര മുതൽ വൈകിട്ട് 9 വരെ  കൂത്താട്ടുകുളം നഗരസഭയുടെ സാംസ്കാരികോൽസവത്തിന്റെ ഭാഗമായാണ്
ഇത്തവണ സംഘടിപ്പിയ്ക്കുന്നത്.

പ്രശസ്ത പണ്ഡിതനും വാഗ്മിയും സാഹിത്യ കലാമർമജ്‌ഞനും സി.ജെ. സ്മാരക പ്രസംഗ സമിതിയുടെ രക്ഷാധികാരിയുമായിരുന്ന റവ. ഡോ. ഏബ്രഹാം വടക്കേലിന്റെ സ്മരണയ്ക്കായി 1979-ൽ സമിതി ഏർപ്പെടുത്തിയിട്ടുള്ള പുരസ്കാരം ഓരോ വർഷവും പോയ വർഷങ്ങളിൽ പ്രസിദ്ധീകരിച്ചിട്ടുള്ള  സാഹിത്യ വിമർശന കൃതികളിൽ നിന്നാണു തെരഞ്ഞെടുക്കുന്നത്.

-0-