പേജുകള്‍‌

20171118

സി ജെ ജന്മശതാബ്ദിയാഘോഷങ്ങൾ തുടങ്ങി

സി ജെ തോമസിന്റെ ജന്മശതാബ്ദിയാഘോഷം കൂത്താട്ടുകുളം ടൗൺഹാളിൽ പ്രൊഫ. എം കെ സാനു സ്മൃതിദീപം തെളിച്ച് ഉദ്ഘാടനംചെയ്യുന്നു
ഇടത്തുനിന്നു് ജോൺപോൾ, ഡോ. എൻ അജയകുമാർ, ടി എം എബ്രഹാം, എം കെ സാനു, പ്രൊഫ. എൻ ഐ അബ്രാഹം, ജോസ് കരിമ്പന, സി എൻ പ്രഭകുമാർ എന്നിവരെ കാണാം. കടപ്പാടു്: ദേശാഭിമാനി
എഴുത്തുകാരൻ സി ജെ തോമസിന്റെ ഒരുവർഷം നീളുന്ന ജന്മശതാബ്ദി ആഘോഷങ്ങൾക്കു 2017 നവംബർ 14നു് ജന്മനാടായ കൂത്താട്ടുകുളത്ത് തുടക്കമായി. കൂത്താട്ടുകുളം ടൗൺഹാളിൽ പ്രൊഫ. എം കെ സാനു സ്മൃതിദീപം തെളിച്ച് ഉദ്ഘാടനംചെയ്തു. തിരക്കഥാകൃത്ത് ജോൺപോൾ അധ്യക്ഷനായി. സി ജെയുടെ നാടകങ്ങളായ 'അവൻ വീണ്ടും വരുന്നു', 'ആ മനുഷ്യൻ നീ തന്നെ', '1128ൽ ക്രൈം 27' എന്നിവയിലെ സംഭാഷണഭാഗങ്ങൾ വേദിയിൽ വായിച്ചുകൊണ്ടു് കാലടിസർവകലാശാല തീയെറ്റർ വിഭാഗം വിദ്യാർത്ഥികളായ എംപി മിഥുനും ആതിര ദിലീപും ഗുരുപ്രണാമമവതരിപ്പിച്ചു.

'താരതമ്യങ്ങളില്ലാത്ത പ്രതിഭാവിസ്മയം: സി ജെ തോമസ്' എന്ന സെമിനാറിൽ 'ഇരുട്ടുകീറുന്ന വജ്രസൂചി', 'സി ജെ ഉണർത്തിയ നാടകകലാപങ്ങൾ', 'രാഷ്ട്രീയ സി ജെ' എന്നീ വിഷയങ്ങളിൽ പ്രൊഫ. എം കെ സാനു, ടി എം എബ്രഹാം, ഡോ. എൻ അജയകുമാർ എന്നിവർ പ്രഭാഷണം നടത്തി. കേരള സാഹിത്യ അക്കാദമി പ്രസിദ്ധപ്പെടുത്തുന്ന സി ജെ തോമസിന്റെ തെരഞ്ഞെടുത്ത ലേഖനങ്ങളുടെ സമാഹാരമായ സി ജെയുടെ ലേഖനങ്ങൾ എന്നകൃതിയുെ ആദ്യവിൽപ്പന എം കെ സാനു നിർവഹിച്ചു. നവതി പിന്നിടുന്ന എം കെ സാനുവിനെയും നാടകസംസ്‌കൃതിയ്ക്കുനല്കിയ സംഭാവനകളുടെ പേരിൽ ടി എം എബ്രഹാമിനെയും പൊന്നാടയണിയിച്ച് ചടങ്ങിൽ ആദരിച്ചു.

പ്രൊഫ. എൻ ഐ അബ്രാഹം, സാനു ഫൌണ്ടേഷൻ സെക്രട്ടറി ഫാ. റോബി കണ്ണൻചിറ,ജോസ് കരിമ്പന തുടങ്ങിയവർ സംസാരിച്ചു. നഗരസഭാ ചെയർമാൻ ബിജു ജോൺ ,സി ജെയുടെ മക്കളായ ബീന എംസൺ, പോൾ സി തോമസ് എന്നിവരും പങ്കെടുത്തു.

സി ജെ സ്മാരകസമിതിയും എം കെ സാനു ഫൌണ്ടേഷനും ചേർന്നായിരുന്നു പരിപാടി സംഘടിപ്പിച്ചതു്.

20171111

സി.ജെ. തോമസ് ദേശീയ പുരസ്‌കാരം ചന്ദ്രശേഖരകമ്പാർക്കു്

ചന്ദ്രശേഖര കമ്പാർ
കടപ്പാടു്: വിക്കിമീഡിയ കോമൺസ്

കൊച്ചി, 2017 നവംബർ 10: നാടകമേഖലയിലെ മൗലിക സംഭാവനയ്ക്ക് എം.കെ. സാനു ഫൗണ്ടേഷൻ ഏർപ്പെടുത്തിയ സി.ജെ. തോമസ് ദേശീയ പുരസ്‌കാരം കന്നഡ എഴുത്തുകാരൻ ചന്ദ്രശേഖരകമ്പാർക്കു് സമ്മാനിക്കുമെന്നു് എം.കെ. സാനു ഫൗണ്ടേഷൻ ജന.സെക്രട്ടറി ഫാ. റോബി കണ്ണഞ്ചിറ അറിയിച്ചു. സി.ജെ. തോമസ് ജന്മശതാബ്ദി ആഘോഷത്തിന്റെ ഭാഗമായി തൃശൂരിലെ സാഹിത്യ അക്കാദമി ഓഡിറ്റോറിയത്തിൽ സംഘടിപ്പിയ്ക്കുന്ന ഡിസംബർ 11ന് ഉച്ചകഴിഞ്ഞു മൂന്നിന് എം.ടി. വാസുദേവൻ നായർ സി.ജെ. തോമസ് ദേശീയ പുരസ്‌കാരം ചന്ദ്രശേഖരകമ്പാർക്കു സമ്മാനിക്കും. നാടക മേഖലയിലെ മൗലികസംഭാവനകൾ പരിഗണിച്ചാണ് സി.ജെ. തോമസ് ദേശീയ പുരസ്‌കാരം നൽകുന്നത്.

80-കാരനായ ചന്ദ്രശേഖര കമ്പാർ (Chandrashekhara Kambara) കവി, നോവലിസ്റ്റ്, ഫോക്ലോറിസ്റ്റ്, നാടകകൃത്ത്, സിനിമാ സംവിധായകൻ എന്നീ നിലകളിൽ പ്രശസ്തനാണ്. വടക്കൻ കന്നഡഭാഷയും ശൈലിയും കഥകളിലും നോവലുകളിലും നാടകത്തിലും പ്രയോഗിച്ച കമ്പാർ ഇന്ത്യയിലെ പ്രാദേശിക അനുഷ്ഠാനങ്ങളോടും ആചാരങ്ങളോടുമാണ് അഭിനിവേശം പുലർത്തിയത്. 1937ൽ ബെൽഗാവി ജില്ലയിലെ ഗോദഗേരി ഗ്രാമത്തിലാണ് ചന്ദ്രശേഖരകമ്പാർ ജനിച്ചത്. സിങ്കാരവ്വ മത്തു അരമനെ എന്ന കമ്പാറിന്റെ നോവൽ കൂലോത്തെ ചിങ്കാരമ്മ എന്ന പേരിൽ മലയാളത്തിലേക്ക് പരിഭാഷപ്പെടുത്തി പ്രസിദ്ധീകരിച്ചിട്ടുണ്ടു്. കന്നഡ സാഹിത്യത്തിൽ നാടോടി പാരമ്പര്യത്തിൽ അധിഷ്ഠിതമായ ഒരു പുതിയ വഴിത്താര തുറക്കുന്നതിൽ കമ്പാർ ആത്മാർത്ഥശ്രമങ്ങൾ നടത്തിയിട്ടുണ്ട്. നാടോടി ഭാഷയും നാടോടി ഗാനങ്ങളുമായി രംഗത്തവതരിപ്പിക്കുന്ന അദ്ദേഹത്തിന്റെ നാടകങ്ങൾ കർണാടകയിൽ പ്രശസ്തങ്ങളാണ്. ജോകുമാരസ്വാമി,സാംഗ്യബാല്യ തുടങ്ങിയ നാടകങ്ങളിലെ വടക്കൻ കന്നഡയുടെ ഭാഷാശൈലി ശ്രദ്ധിക്കപ്പെട്ടിട്ടുണ്ട്. ജ്ഞാനപീഠ പുരസ്‌കാരം (2010), പത്മശ്രീ, ആശാൻ പുരസ്‌കാരം (1982),കബീർ സമ്മാനം, കാളിദാസ സമ്മാനം, പമ്പ അവാർഡ്, കർണാടക സാഹിത്യ അക്കാദമി അവാർഡ് തുടങ്ങി നിരവധി പുരസ്‌കാരങ്ങൾ കമ്പാറിനെ തേടിയെത്തിയിട്ടുണ്ട്. 1975 ൽ രാജ്യത്തെ ഏറ്റവും മികച്ച നാടകമായി കമ്പാറിന്റെ നാട്യസംഘ് തെരഞ്ഞെടുക്കപ്പെട്ടു. 2012 ബാംഗ്‌ളൂർ കൈരളികലാസമിതി ഓണാഘോഷച്ചടങ്ങിന്റെ സമാപന സമ്മേളനത്തിൽ പ്രസംഗിച്ചുകൊണ്ടു് ജാതിമതഭേദമെന്യേ എല്ലാവരേയും ഒന്നിപ്പിക്കുന്ന നന്മയുടെ ഉൽസവമായ ഓണം മഹത്തായസന്ദേശമാണ് വിഭാവന ചെയ്യുന്നതെന്നു് പറഞ്ഞത് ശ്രദ്ധിയ്ക്കപ്പെട്ടിരുന്നു.

സി.ജെ. തോമസ് ജന്മശതാബ്ദി വർഷം


ഒരു വർഷം നീളുന്ന സി.ജെ. തോമസ് ജന്മശതാബ്ദി പരിപാടികൾക്കു് എം.കെ. സാനു ഫൗണ്ടേഷൻ പദ്ധതിയിട്ടിട്ടുണ്ട്
സി.ജെ. ജന്മശതാബ്ദി പരിപാടികളുടെ ഉദ്ഘാടനം കൂത്താട്ടുകുളത്തെ സി ജെ സ്മാരകസമിതിയുമായിച്ചേർന്നു് നവംബർ 14നു വൈകിട്ട് മൂന്നിനു കൂത്താട്ടുകുളം ടൗൺഹാളിൽ പ്രഫ. എം.കെ.സാനു ഉദ്ഘാടനം ചെയ്യും. അന്നു വൈകിട്ട് 5.30ന് ചങ്ങമ്പുഴ പാർക്കിൽ ചങ്ങമ്പുഴ സാംസ്‌കാരിക കേന്ദ്രത്തിന്റെയും പി.ജെ. ചെറിയാൻ ഫൗണ്ടേഷന്റെയും നേതൃത്വത്തിൽ സെമിനാർ സംഘടിപ്പിക്കും. എസ്. രമേശൻ, പ്രഫ. എം. തോമസ് മാത്യു എന്നിവർ പ്രഭാഷണം നടത്തും. ഓരോ മാസവും സംസ്ഥാനത്തിന്റെ വിവിധ ഭാഗങ്ങളിലായി സർഗ സംവാദങ്ങളും പഠന ശിബിരങ്ങളും സംഘടിപ്പിക്കുമെന്ന് ഫാ. റോബി കണ്ണഞ്ചിറ പറഞ്ഞു.

എം.കെ. സാനു ഫൗണ്ടേഷൻ, ചാവറ കൾച്ചറൽ സെന്റർ, കാരിക്കാമുറി, കൊച്ചി, 11

20150123

മദ്യവിരുദ്ധ സന്ദേശയാത്രയും പി.കെ ബാലകൃഷ്ണപിള്ള അനുസ്മരണ സമ്മേളനവും നടന്നു

പി.കെ. ബാലകൃഷ്ണപിള്ള അനുസ്മരണ സമ്മേളനം മദ്യനിരോധന സമിതി സംസ്ഥാന വൈസ് പ്രസിഡന്റ് ഫാ. വര്‍ഗീസ് മുഴുത്തേറ്റ് ഉദ്ഘാടനം ചെയ്യുന്നു. റ്റി എം വറുഗീസ്, അഡ്വ. സീനാ ജോണ്‍സണ്‍, ആര്‍. രഘു, ഡോ. വിന്‍സന്റ് മാളിയേക്കല്‍, പ്രൊഫ. എന്‍.ഐ. അബ്രാഹം എന്നിവര്‍ സമീപം

കൂത്താട്ടുകുളം, ജനുവരി 23: ഗാന്ധിയനും കേരള മദ്യ നിരോധന സമിതിയുടെ സംസ്ഥാന മുന്‍ ജനറല്‍ സെക്രട്ടറിയും അദ്ധ്യാപകനുമായിരുന്ന പി.കെ ബാലകൃഷ്ണപിള്ളയുടെ രണ്ടാം ചരമ വാര്‍ഷിക അനുസ്മരണ സമ്മേളനവും മൂന്ന് ജില്ലകളെ ബന്ധിപ്പിച്ചുള്ള മദ്യ വിരുദ്ധ സന്ദേശയാത്രയും 2015 ജനുവരി 23-നു് നടന്നു. മദ്യനിരോധന സമിതി, പ്രകൃതി ജീവന സമിതി, സി.ജെ സ്മാരക സമിതി എന്നിവയുടെ സംയുക്താഭിമുഖ്യത്തിലാണ് മദ്യവിരുദ്ധ സന്ദേശയാത്രയും പി.കെ. ബാലകൃഷ്ണപിള്ള അനുസ്മരണ സമ്മേളനവും സംഘടിപ്പിച്ചത്. വെള്ളിയാഴ്ച രാവിലെ ഒമ്പതിന് വഴിത്തലയില്‍നിന്നാരംഭിച്ച സന്ദേശയാത്ര ശ്രീനാരായണ ധര്‍മ പരിപാലന യോഗം വഴിത്തല ശാഖാ സെക്രട്ടറി രാജന്‍ പന്തമാക്കല്‍ ഉദ്ഘാടനം ചെയ്തു. മാറിക, പാലക്കുഴ, കോഴിപ്പള്ളി, മംഗലത്തുതാഴം, വെളിയന്നൂര്‍, പുതുവേലി, കൂത്താട്ടുകുളം രാമപുരം കവല, പ്രൈവറ്റ് ബസ്റ്റാന്റ് എന്നിവിടങ്ങളില്‍ പര്യടനം നടത്തി. കൂത്താട്ടുകുളം കെ.ടി. ജേക്കബ് മെമ്മോറിയല്‍ ടൗണ്‍ ഹാളില്‍ സമാപിച്ചു.

വൈകിട്ട് അഞ്ചിന് നടന്ന പി.കെ ബാലകൃഷ്ണപിള്ള അനുസ്മരണ സമ്മേളനം മദ്യനിരോധന സമിതി സംസ്ഥാന വൈസ് പ്രസിഡന്റ് ഫാ. വര്‍ഗീസ് മുഴുത്തേറ്റ് ഉദ്ഘാടനം ചെയ്തു. എം.പി. മന്മഥന്‍ പ്രസിഡന്റും ബാലകൃഷ്ണപിള്ള ജനറല്‍ സെക്രട്ടറിയുമായിരുന്ന കാലത്താണ് മദ്യനിരോധന സമിതി കേരള സംസ്ഥാനമൊട്ടാകെ വളര്‍ന്നതെന്ന് അദ്ദേഹം അനുസ്മരിച്ചു.

കൂത്താട്ടുകുളം ഗ്രാമപ്പഞ്ചായത്ത് പ്രസിഡന്റ് അഡ്വ. സീനാ ജോണ്‍സണ്‍ അധ്യക്ഷത വഹിച്ചു. പൂര്‍ണോദയ ബുക്ക് ട്രസ്റ്റ് മാനേജിങ് കമ്മിറ്റി അംഗമായ ആര്‍. രഘു മുഖ്യപ്രഭാഷണം നടത്തി. സി.ജെ. സ്മാരക സമിതി പ്രസിഡന്റ് പ്രൊഫ. എന്‍.ഐ. അബ്രാഹം, കേരള മദ്യ നിരോധന സമിതി ഇടുക്കി ജില്ലാ പ്രസിഡന്റ് ഡോ. വിന്‍സന്റ് മാളിയേക്കല്‍, ഫാ. തോമസ് കാക്കൂര്‍, റ്റി എം വറുഗീസ്, വി.എന്‍. ഗോപകുമാര്‍ എന്നിവര്‍ സംസാരിച്ചു. സ്വാഗത സംഘം ജനറല്‍ കണ്‍വീനര്‍ സി.എ. തങ്കച്ചന്‍, സ്വാഗതവും സി.എ. ബിജു നന്ദിയും പറഞ്ഞു.

20150122

പി.കെ. ബാലകൃഷ്‌ണപിള്ള (1924 - 2013)


പ്രമുഖ ഗാന്ധിയനും മദ്യനിരോധന സമിതി മുന്‍ സംസ്‌ഥാന സെക്രട്ടറിയുമായിരുന്നു പി.കെ. ബാലകൃഷ്‌ണപിള്ള (1924 ഡിസംബര്‍ 30 - 2013 ജനുവരി 23).

വെളിയന്നൂര്‍ പൂവക്കുളത്ത് പാര്‍വതിയമ്മയുടേയും ശങ്കരന്‍നായരുടേയും മകനായി 1924 ഡിസംബര്‍ 30നാണ് ബാലകൃഷ്ണപിള്ള ജനിച്ചത്. അരീക്കര സെന്റ് റോക്കീസ് സ്‌കൂള്‍, കൂത്താട്ടുകുളം വി.എം. സ്‌കൂള്‍, കിടങ്ങൂര്‍ എന്‍എസ്എസ് ഹൈസ്‌കൂള്‍, രാമപുരം സെന്റ് അഗസ്റ്റിന്‍സ് സ്‌കൂള്‍ എന്നിവിടങ്ങളിലായിരുന്നു സ്‌കൂള്‍വിദ്യാഭ്യാസം. തേവര എസ്എച്ച് കോളേജില്‍നിന്നു് ബിരുദമെടുത്തു.

സോഷ്യലിസ്റ്റ് പാര്‍ട്ടിയിലൂടെയാണു് അദ്ദേഹം പൊതുരംഗത്തേയ്ക്കു് പ്രവേശിച്ചതു്. 1951-52 കാലത്ത് തേവര എസ്എച്ച് കോളേജ് യൂണിയന്‍ ചെയര്‍മാനായിരുന്നു.സോഷ്യലിസ്റ്റ് വിദ്യാര്‍ത്ഥി സംഘടനയുടെ നേതാവായിരുന്നു അന്നു് അദ്ദേഹം. തന്നെ സോഷ്യലിസ്റ്റ് പാര്‍ട്ടിയില്‍ ചേര്‍ത്തതു് പി.കെ. ബാലകൃഷ്‌ണപിള്ളയായിരുന്നുവെന്നു് സോഷ്യലിസ്റ്റ് നേതാവു് പോള്‍ വി കുന്നില്‍ അനുസ്മരിച്ചിട്ടുണ്ടു്. പട്ടം താണുപിള്ള മുഖ്യമന്ത്രിയായിരുന്ന സമയത്തു് പ്രജാ സോഷ്യലിസ്റ്റ് പാര്‍ട്ടിയുടെ തിരുവനന്തപുരം ഓഫീസ് സെക്രട്ടറിയായി പ്രവര്‍ത്തിച്ചു. 1955-ല്‍ വെളിയന്നൂര്‍ വന്ദേമാതരം സ്‌കൂള്‍ സ്‌ഥാപിക്കുന്നതിനു് മുന്‍കയ്യെടുത്തു. സ്‌കൂളിന്റെ പ്രഥമ പ്രധാനാധ്യാപകനാകേണ്ടതായിവന്നതുകൊണ്ടു് തിരുവനന്തപുരം വിടേണ്ടിവന്നു.

എന്‍എസ്‌എസില്‍ സജീവമായ അദ്ദേഹം ആ ബന്ധത്തില്‍ കുറെക്കാലം കേരള കോണ്‍ഗ്രസില്‍ പ്രവര്‍ത്തിച്ചു. പിന്നീടു് കക്ഷിരാഷ്ട്രീയം ഉപേക്ഷിച്ചു് സര്‍വോദയ പ്രവര്‍ത്തകനായി. സര്‍വോദയ പ്രസ്ഥാനത്തില്‍ ആചാര്യ വിനോബ ഭവെയും ലോക് നായക് ജയപ്രകാശ് നാരായണനും തമ്മില്‍ ഭിന്നതയുണ്ടായപ്പോള്‍ എം പി മന്മഥനോടൊപ്പം ജയപ്രകാശ് നാരായണന്റെ ഭാഗത്തു് നിലയുറപ്പിച്ചു. എം പി മന്മഥന്‍ പ്രസിഡന്റായിരുന്ന കാലത്തു് 1980കളിലും 1990കളിലും രണ്ടുവട്ടം മദ്യനിരോധന സമിതിയുടെ സംസ്ഥാന ജനറല്‍ സെക്രട്ടറിയായി രണ്ടുതവണ സേവനമനുഷ്ഠിച്ചു.

വെളിയന്നൂര്‍ വന്ദേമാതരം ഹയര്‍ സെക്കന്‍ഡറി സ്‌കൂള്‍ സ്‌ഥാപകനും പ്രഥമ ഹെഡ്‌മാസ്‌റ്ററുമായിരുന്ന അദ്ദേഹം രാമനാട്ടുകര സേവാ മന്ദിര്‍ ടിടിഐയില്‍ പ്രധാനാധ്യാപകനായി പിന്നീടു് സേവനമനുഷ്ഠിച്ചു. 1985ല്‍ മികച്ച അധ്യാപകനുള്ള സംസ്ഥാന പുരസ്‌കാരംനേടി.

പ്രകൃതിജീവനരംഗത്തും സജീവമായിരുന്നു. പ്രകൃതിജീവന സമിതി സംസ്ഥാന സമിതിയംഗവും കൂത്താട്ടുകുളം കേന്ദ്രത്തിന്റെ സ്ഥാപക സെക്രട്ടറിയുമാണ്. സര്‍വോദയപ്രസ്ഥാനത്തിന്റെ സംസ്ഥാന മണ്ഡലം അസിസ്റ്റന്റ് സെക്രട്ടറി, ഗാന്ധിസാഹിത്യ പ്രചാരണത്തിന്റെ പ്രധാന പ്രവര്‍ത്തകന്‍, പൂര്‍ണോദയ ബുക്ക് ട്രസ്റ്റ് വൈസ് പ്രസിഡന്റ് എന്നീനിലകളിലും പ്രവര്‍ത്തിച്ചു. എം.പി. മന്മഥന്‍ സ്‌മാരക ട്രസ്‌റ്റ്‌ സ്‌ഥാപക സെക്രട്ടറി, വൈസ്‌ പ്രസിഡന്റ്‌, കൂത്താട്ടുകുളം പ്രകൃതിജീവന സമിതി പ്രസിഡന്റ്‌, എന്‍എസ്‌എസ്‌ പ്രതിനിധി സഭാംഗം, കേരള സ്വകാര്യ സ്‌കൂള്‍ പ്രധാനാധ്യാപക സംഘടനയുടെ സംസ്ഥാന വൈസ് പ്രസിഡന്റ്, അധ്യാപക ട്രെയിനിങ് സ്‌കൂള്‍ പ്രധാന അധ്യാപകരുടെ സംഘടനയുടെ സ്ഥാപക സെക്രട്ടറി, അരീക്കര വെളിയന്നൂര്‍ വിവിധോദ്ദേശ സഹ. സംഘം പ്രസിഡന്റ്, തേവര എസ്എച്ച് കോളേജ് സ്റ്റുഡന്റ്‌സ് സംഘം പ്രസിഡന്റ്, കൂത്താട്ടുകുളം ഫാര്‍മേഴ്‌സ് ബാങ്ക് ഭരണസമിതിയംഗം എന്നീനിലകളില്‍ പ്രവര്‍ത്തിച്ചു. ഉഴവൂര്‍ ഗ്രാമപഞ്ചായത്ത് മെമ്പറായി ഐകകണ്ഠ്യേന തിരഞ്ഞെടുക്കപ്പെട്ടെങ്കിലും സത്യപ്രതിജ്ഞകഴിഞ്ഞ് അരമണിക്കൂറിനകം രാജിവച്ചു. കൂത്താട്ടുകുളം കേന്ദ്രമായുള്ള സി.ജെ. സ്മാരക സമിതിയുടെ വൈസ് പ്രസിഡന്റായിരുന്നു. സമിതിയുടെ പ്രതിമാസ ചര്‍ച്ചാപരിപാടിയും ബാലന്‍സാറിന്റെ ചുമതലയിലായിരുന്നു. സ്‌കൗട്ട് ആന്‍ഡ് ഗൈഡ്‌സിലും പ്രവര്‍ത്തിച്ചു.

മരണം

2015 ജനുവരി 23നു് അതിരാവിലെ 5മണിയ്ക്കു് 88-ആം വയസ്സില്‍ അന്തരിച്ചു. സംസ്‌കാരം അന്നു് വൈകുന്നേരം നാലരയ്ക്കു് വെളിയന്നൂരിലെ പൂവക്കുളത്തു് (ശ്രീനികേതനം) വീട്ടുവളപ്പില്‍ നടന്നു.

കുടുംബം

കൂത്താട്ടുകുളം നാക്കാട്ടുമഠത്തില്‍ എന്‍. ഈശ്വരിയമ്മയാണു് (കൂത്താട്ടുകുളം ഹൈസ്‌കൂള്‍ റിട്ട. അധ്യാപിക) ഭാര്യ. ഗിരിജ (ടീച്ചര്‍, ഗവ. റ്റി.റ്റി.ഐ. ഇടപ്പള്ളി), ബി.ഹരിദാസ്‌ (പെരിയാര്‍ ലാറ്റക്‌സ്‌, മുവാറ്റുപുഴ), ബി. സരിത (ടീച്ചര്‍, വന്ദേമാതരം ഹയര്‍ സെക്കന്ററി സ്‌കൂള്‍, വെളിയന്നൂര്‍)എന്നിവര്‍ മക്കളും ബി. അശോകന്‍ (ഗായത്രി അഡ്വര്‍ട്ടൈസിംഗ്‌ ഏജന്‍സി, എറണാകുളം), പ്രിയ പി.നായര്‍ (സബ്‌ ട്രഷറി, കൂത്താട്ടുകുളം), അഡ്വ. രമേഷ്‌ ബാബു (വെളിയന്നൂര്‍ വന്ദേമാതരം ഹയര്‍ സെക്കന്ററി സ്‌കൂള്‍ മാനേജര്‍) എന്നിവര്‍ മരുമക്കളുമാണു്.

20140829

മേരി ജോണ്‍ കൂത്താട്ടുകുളം


ദാമ്പത്യജീവിതത്തിന്റെ തടവറയില്‍ നിന്ന്‌ പുറത്ത്‌ വന്ന്‌ കവിതയെയും, ജീവിതത്തെയും ഒരുപോലെ ആശ്ലേഷിച്ച എഴുത്തുകാരിയാണ്‌, മേരിജോണ്‍ കൂത്താട്ടുകുളം. ധാര്‍മ്മികബോധവും, സ്വാനുഭവങ്ങളുടെ ഭാവതീവ്രതയും, വികാരസാന്ദ്രമാക്കിയ മേരിജോണ്‍ കവിതകള്‍ ഒരു കാലത്ത്‌ നമ്മുടെ സ്‌ക്കൂള്‍ പാഠപുസ്‌തകങ്ങളില്‍ പതിവായി പ്രത്യക്ഷപ്പെട്ടു കൊണ്ടിരുന്നു. മനുഷ്യനോടും, പ്രകൃതിയോടുമുള്ള ഉദാത്തമായ സ്‌നേഹവും, ആരാധനയും നിറഞ്ഞതാണ്‌ ആ കവിതകള്‍ എല്ലാം തന്നെ.

കൂത്താട്ടുകുളത്തു് വടകര യോഹന്നാൻ മാംദാന ഓർത്തഡോക്സ് സുറിയാനി പള്ളിവികാരി ചൊള്ളമ്പയിൽ വീട്ടില്‍ യോഹന്നാൻ കോർ എപ്പിസ്ക്കോപ്പയുടെയും (1870-1951) പുത്തൻ കുരിശ് ഏഴക്കരനാട്ടെ അന്നമ്മയുടേയും മകളായി 1905 ജനുവരി 22 നു ജനിച്ചു. മേരിജോണിന്റെ ഇളയ സഹോദരനാണു് സി.ജെ.തോമസ്.

പന്ത്രണ്ടാമത്തെ വയസ്സില്‍ വിവാഹിതയായ മേരി പ്രൈവറ്റായി പഠിച്ചാണ്‌ മലയാളം ഏഴാം ക്ലാസ്സും, ഹയറും പാസ്സായത്‌. എന്നാല്‍ വിദ്യാഭ്യാസത്തിനും, സാഹിത്യാഭിരുചിക്കും യാതൊരുവിലയും കല്‌പിക്കാതെ അടുക്കളയ്‌ക്കുള്ളില്‍ തളച്ചിടാനുള്ള ഭര്‍ത്താവിന്റെയും, ഭര്‍ത്തൃവീട്ടുകാരുടേയും നീക്കം മേരിക്ക്‌ സഹിക്കാനായില്ല. ഒരു ദിവസം രാത്രിയില്‍ ആരുമറിയാതെ മേരി സ്വന്തം വീട്ടിലേക്ക്‌ തിരിച്ചു പോന്നു. ളോഹയൂരി പൗരോഹിത്യത്തിന്റെ ആവൃതിക്കുള്ളില്‍ നിന്ന്‌ രക്ഷപ്പെട്ട സഹോദരന്‍ സി.ജെ.യെപ്പോലെ. എന്നാല്‍ വീട്ടുകാരുടെ സമ്മര്‍ദ്ദം മൂലം ഭര്‍ത്തൃഗൃഹത്തിലേക്ക്‌ തിരിച്ചുപോകേണ്ടി വരും എന്ന്‌ തോന്നിയപ്പോള്‍ അതില്‍ നിന്ന്‌ രക്ഷപ്പെടാന്‍ പതിനഞ്ച്‌ രൂപയുമായി ആ പെണ്‍കുട്ടി തിരുവനന്തപുരത്തിന്‌ വണ്ടി കയറി.

തിരുവനന്തപുരത്തെ ഡോ. പല്‌പുവിന്റെ മക്കളായ ആനന്ദലക്ഷ്‌മിയും, ദാക്ഷായണിയും ആയി മേരിക്ക്‌ നേരത്തെ പരിചയമുണ്ടായിരുന്നു. മേരി അഭയം തേടി ചെന്നത്‌ നന്തന്‍കോട്ടുള്ള അവരുടെ വീട്ടിലേക്കായിരുന്നു. കാര്യമറിഞ്ഞപ്പോള്‍ ഡോ. പല്‍പ്പു മേരിയെ സ്വന്തം മകളെപ്പോലെ സ്വീകരിച്ചു. അവിടെ താമസിച്ച്‌ മലയാളം വിദ്വാന്‍ പരീക്ഷ പാസ്സായി. ഡോ.പല്‍പ്പുവിന്റെ സഹായത്തോടെ അധ്യാപികയായി ജോലിയും നേടി.

ഇക്കാലത്തെല്ലാം വായനയും എഴുത്തും ദിനചര്യപോലെ തുടര്‍ന്നു പോന്നു. അതിനിടയില്‍ അധ്യാപകജോലിയുപേക്ഷിച്ച്‌ തിരുവിതാംകൂര്‍ അഞ്ചല്‍ സര്‍വ്വീസില്‍ ചേര്‍ന്നു. അധ്യാപകജോലിയെ അപേക്ഷിച്ച്‌ അക്കാലത്ത്‌ അഞ്ചല്‍ ഡിപ്പാര്‍ട്ട്‌മെന്റിലുണ്ടായിരുന്ന ഉയര്‍ന്നശമ്പളവും, സ്‌ക്കൂളില്‍ പഠിപ്പിക്കുന്നതിനുള്ള അനാരോഗ്യവുമായിരുന്നു അതിനവരെ പ്രേരിപ്പിച്ചത്‌.

1960 ല്‍ പോസ്റ്റല്‍ സര്‍വ്വീസില്‍ നിന്ന്‌ വിരമിച്ചശേഷം തിരുവന്തപുരത്ത്‌ എം.എന്‍.ലെയിനിലുള്ള വീട്ടില്‍ സഹോദരിയോടും കുടുംബത്തോടും ഒപ്പമായിരുന്നു താമസം.

സര്‍ഗ്ഗാത്മകസാഹിത്യത്തിന്റേയും, കവിതയുടേയും മേഖലയില്‍ വിഹരിക്കാന്‍ ദാമ്പത്യജീവിതം തന്നെ ഉപേക്ഷിച്ച ആ എഴുത്തുകാരി കൈരളിയ്‌ക്ക്‌ കാഴ്‌ചവച്ച ശ്രദ്ധേയമായ കൃതികളാണ്‌ പ്രഭാതപുഷ്‌പം, ബാഷ്‌പമണികള്‍, അന്തിനക്ഷത്രം, പൂജാപുഷ്‌പം, അമ്മയും മകളും, കാറ്റ്‌ പറഞ്ഞ കഥ, ചിരിക്കുന്ന കാട്ടാര്‍ തുടങ്ങിയവ. ഇതിന്‌ പുറമെ വിവിധ ആനുകാലികങ്ങളിലും, വാര്‍ഷികപ്പതിപ്പുകളിലും പ്രസിദ്ധീകരിച്ച ഒട്ടനവധി കവിതകളും മേരിജോണിന്റേതായിട്ടുണ്ടു്‌.1996 ൽ കേരള സാഹിത്യ അക്കാദമി സമഗ്ര സംഭാവനക്കുള്ള പുരസ്‌കാരം നൽകി ആദരിച്ചു.

1998 ഡിസംബര്‍ 2 ന്‌ കവിതയ്‌ക്കും സാഹിത്യത്തിനും ജീവിതം ഉഴിഞ്ഞ്‌ വച്ച മേരിജോണ്‍ കൂത്താട്ടുകുളം അന്തരിച്ചു.

(ജോസ് കരിമ്പന എഡിറ്റ് ചെയ്തു് 2009 മാര്‍‍ച്ച് ഏഴാം തീയതി സി.ജെ.സ്മാരക സമിതി പ്രകാശിപ്പിച്ച സ്മൃതി -2009 സ്മരണികയില്‍ നിന്നു്.)

കൂത്താട്ടുകുളം മേരിജോണിന്റെ കൃതികൾ

  • പ്രഭാതപുഷ്പം
  • ബാഷ്പമണികൾ
  • അന്തിനക്ഷത്രം
  • പൂജാപുഷ്‌പം
  • അമ്മയും മകളും
  • കാറ്റു പറഞ്ഞ കഥ
  • ചിരിക്കുന്ന കാട്ടാര്‍
  • കാവ്യകൗമുദി
  • കബീറിന്റെ ഗീതങ്ങൾ (കബീറിന്റെ നൂറുഗാനങ്ങളുടെ വിവര്‍ത്തനങ്ങള്‍)
  • തെരഞ്ഞെടുത്ത കവിതകള്‍
^ ^